KAK Laiha Direitu Investiga FFTL

DILI - Sekretariu Jeral (Sekjer) Federasaun Futebol Timor-Leste (FFTL), Amandio de Araujo rejeita Komisaun Anti Korupsaun (KAK) nebee atu halo investigasaun ba federasaun nee, relasiona ho ezekusaun orsamentu ba eventu Sea Games, nebee tinan kotuk halao iha Indonesia.

Amandio ba jornalista iha Sede FFTL-Dili, Tersa (08/05), hateten, orsamentu nebee aloka ba iha Sea Games nee pertense ba responsabilidade Sekretariu Estadu Joventudi no Desportu (SEJD), laos FFTL. Needuni KAK iha direitu atu investiga SEJD ou ba iha CONTL, tanba sira maka kaer osan ida nee.

Needuni Amandio husu ba SEJD, atu labele hatudu liman ba ema seluk, hanesan dadauk hatoo iha publiku katak FFTL seidauk selu hotel balun iha Indonesia, ida nee mos bosok publiku. Tanba iha nasaun nebee deit kuandu hela iha hotel atu sai tenke selu kedas, laos sai tiha mai nia rain maka atu selu, ida nee bosok. FFTL husu deit ba SEJD atu ajuda laos atu fo subsidiu, needuni KAK lalika mai atu investiga FFTL. Tuir loloos KAK atu halo investigasaun ba iha SEJD, kona ba orsamentu hirak nebee aloka ba iha eventu Sea Games.

“Kazu ida nebee sira hatudu liman mai ami, ida nee hanesan konspirasaun politika, hakarak hatun ami nia lider sira nee. Hau hare iha Jornal hakerek kona ba ami nia Prezidente FFTL, nudar lider CNRT, ida nee atu daet ba iha ita nia Xefi Governu, Kay Rala Xanana Gusmão. Ida nee konspirasaun politika kotor nebee maka besik eleisaun hodi hatun ami nia lider sira,” nia hateten.

Amandio la aseita KAK atu mai halo investigasaun mai FFTL, tanba FFTL orgaun ida nebee laos tutela ba governu. Nia rekoinese katak FFTL nunka simu subsidiu governu nebee aprova mai husi Parlamentu Nasional. Kuandu FFTL hetan ajuda ruma bainhira iha jogus internasinal, FFTL bele hatoo ba iha SEJD, nebee dalam bentuk bantuan, laos subsidiu. Kuandu subsidiu konserteza hetan aprova husi parlamentu.

“Ami rejeita karta mai husi KAK katak subsidiu, durante subsidiu laiha ba ami, ita bele haree took iha parlamentu katak SEJD fo subsidiu ba FFTL kada tinan-tinan iha zero, ami hetan kuandu atividade internasional lori Timor nian naran, kuandu ami nia osan latoo maka ami husu ba iha SEJD liu husi proposta nebee iha,” nia esplika.

Nia dehan, KAK hakarak hetan dokumentus, ajuda husi governu 2002 too mai iha 2012, FFTL nunka simu buat ida husi governu. Bainhira koalia kona ba orsamentu selu hotel iha Indonesia, ne’ebe sai iha publiku katak FFTL la selu hotel, tuir Amandio, ida nee SEJD konfundi sala karik, tanba FFTL halo tiha nia vizita ba nasaun barak, bainhira hela iha hotel, kuandu nia sai selu kedas, la hanesan SEJD koalia nee.

Kona ba hotel, sira nia orsamentu tama iha jogu Komite Olimpiku ho SEJD sira nia konta, laos ba iha FFTL nia konta. Sira diskunfia hotel la selu, see karik otel nee FFTL la selu bele klarifika iha konsuladu TL nian iha Bali.

Kona ba iha familia ba tuir eventu Sea Games, membru FFTL lori duni sira nia familia, maibe sira nee seluk rasik, laos utiliza osan nebee aloka tiha ona ba iha jogador sira, tuir paket neebe aseita husi kimisaun PAE husi SEJD nian.

“Ami la book osan hirak ne’e ba interese ema seluk nian ba iha interese ekipa nee ninian. Kuandu ema ida ne’ebe dudu KAK mai investiga FFTL ne’e nia matan delek, nia la hatene prosesu ami nian, tanba ami hahu ami nia aktividade iha 2001 ho zero too mai, ami halo prosesu 2005 maka FIFA hanoin ami fo subsidiu ba ami husi orsamentu ne’ebe hanaran FIP katak tinan-tinan hetan 250 ribu Dolar Amerikanu, ida ne’e ba nia membru hamutuk 208 iha mundu tomak,” nia informa.

Atu halo auditoriu ba orsamentu hirak ne’e, FIFA rasik maka sei haruka nia ema mai halo audit ba iha FFTL, laos KAK maka atu halo investiga kona ba ida ne’e. Bainhira KAK maka dalaruma ida ne’e iha ona konspirasaun politiku ruma maka haruka atu halo investigasaun ba FFTL.

Iha fatin seluk, Sekretariu Estadu Juventudi Desportu (SEJD), Miguel Manetelu ne’ebe informa liu husi Jurnal Independente katak KAK atu investiga FFTL, tanba diskunfia iha korupsaun iha FFTL. FFTL deskunfia hamosu indikasaun Korrupsaun Kolusaun Nepotismu ba falsifikasaun resivu eventu Sea Games foin lalais nee iha Indonesia. “Maske osan nee la boot, maibe ne’e osan povu nian, hau sente merese atu investiga duni FFTL no talves mos bele investiga mai ami, tanba ami maka hasai osan fo apoiu,” tenik Manetelu.

Nia dehan, se FFTL hatama ona relatoriu ne’e ba nia parte haree iha buat balun ladun loos iha gastu orsamentu. Kazu FFTL laos foin maka akontese indikasaun KKN, maibe desde uluk nia parte husu ba Inspetor Jeral Estadu atu investiga FFTL inklui mos organizasaun desportiva hotu nebe hetan apoiu husi governu.

Manetelu hatutan, foin lalais nia simu karta husi Panitia Sea Games Indonesia nian nebee informa katak, hotel balun iha Indonesia ne’ebe FFTL uza hodi hela durante Sea Games, seidauk selu. car

STL,  09 Maiu 2012