KAK Aprezenta Relatoriu Auto-Avaliasaun ba Konseilhu Ministrus

Radio, online – Komisaun Anti Korupsaun (KAK), foin lalais ne’e aprezenta relatoriu konaba auto-avaliasaun implementasaun Konvensaun Anti-Korupsaun Nasoens Unidas (UNKAK) iha Timor-Leste. 

Informasaun ne’e radioonlione.com asesu liu husi via email KAK nian iha dia (2/05) . Komunikadu ne’e hateten, Tim Komisaun Anti-Korrupsaun (KAK) ne’ebe lidera husi Komisáriu Aderito de Jesus Soares, ohin halo aprezentasaun ba Konseilhu Ministrus kona ba relatóriu auto-avaliasaun Konvensaun Anti-Korupsaun Nasoens Unidas (UNKAK) nian iha Timor-Leste. 

Aprezentasaun ne’ebe han tempu durante minutu tolu-nulu ne’e foka ba pontus importante balu inkluindu mekanismu revizaun UNKAK nian, siklu revizaun, dezafius ne’ebe hasoru, medidas balu ne’ebe foti hodi halo konsiderasaun wainhira halo auto-avaliasaun ba siklu tuir mai, no abordajen global konaba Timor-Leste nia estratejia nasional ba kombate korrupsaun. 

Konseilu Ministrus simu ho laran luak relatóriu auto-avaliasaun ne’e no trata relatóriu ne’e hanesan dokumentu importante ida kona ba Timor-Leste nia esforsu hodi kumpri lala’ok konvensaun internasional nian. Primeiru Ministru Kay Rala Xanana Gusmão iha nia intervensaun hatete katak relatóriu auto-avaliasaun ne’e tenki sai nudar baze importante ida atu hodi refleta iha ita nia prosesu dezenvolvimentu estratejia nasional ba kombate korrupsaun iha Timor-Leste. 

Timor-Leste hahu nia prosesu auto-avaliasaun UNKAK iha fulan Abril 2011 depois de Konseilhu Ministrus hatudu KAK sai nudar pontu-vokal reprezenta Timor-Leste no atu lidera prosesu revizaun ba auto-avaliasaun ne’e. Mekanismu revizaun ba implementasaun UNKAK iha Timor-Leste ne’e foka ba Siklu Dahuluk. 

Iha Siklu Dahuluk ne’e hare ba Kapitulu III konaba Penalizasaun no Implementasaun Lei no Kapitulu IV konaba Kooperasaun Internasional. Prosesu revizaun ne’e hetan suporta husi Sekretariadu Mekanismu Revizaun UNKAK nian iha Viena no Misaun ONU iha Timor-Leste (UNMIT). Hamutuk perguntas liu 300 maka hetan revizaun iha durante prosesu halo auto-avaliasaun ne’e. 

Aprezentasaun ida ohin ne’e halo antes de Peritus Country Visit nian mai vizita Timor-Leste, ne’ebe tuir kalendáriu sei hala’o iha entre loron 22-25 Maiu 2012.

RLD, 04 Maiu 2012