Julgamentu Lucia Lobato Tribunal Rona Deklarasaun Prezidente de Juri

STL, 25 Maiu 2012

Tribunal Distrital Dili

DILI - Tribunal Dsitrital Dili (TDD), iha Kinta (24/05), kontinua rona deklarasaun husi Ricardo da Costa, relasiona ho kazu korupsaun, falsifikasaun dokumentus no abuzu poder nebee diskunfia involve arguida Lucia Lobato no arguidu Antonio Freitas.

Ricardo nudar funsionariu publiku Ministeriu Justisa  nian, nebee sai prezidente de juri iha prosesu aprovizionamentu ba projeitu hirak nebee lori Lucia Lobato no Antonio Freitas ba tribunal. Nudar prezidente de juri, Ricardo mak halo avaliasaun dokumnetus husi kompania nebee hatama sira nia aplikasaun konkursu reabilitasaun edefisio notariadu, rejistu sivil iha Distrito Aileu no Ermera. Ricardo deklara, iha momentu nebaa, iha kompainia lubuk ida mak hatama dokumentus, maibe iha avaliasaun iha deit kompania 3 mak manan.

“Kompania tolu nebee manan laos hau mesak mak rekomenda, maibe ekipa de juri hamutuk ho membru sira mak rekomenda ba superior hodi halo aprovasaun, too ikus kompania Levi mak manan projeitu nee iha Distritu Aileu,” haktuir Ricardo ba Tribunal.

Nia esplika, dokumentus final laos asina deit, maibe entrega uluk ba juri ida-idak, hodi estuda, foin mak halo asina no projeito iha Lospalos, nia laiha koinhesementu. Ba projeito hotu laos haree husi presu kiik ka boot maibe haree husi kualidade obra, nunee bele fo benefisio ba ema hotu.

Julgamentu iha fulan kotuk, Tribunal rona testamunha hamutuk ema nain sanulu resin, nomos agora daudauk, Tribunal rona tan testamunha balun, maibe kazu nee seidauk too nia rohan no testamunha balun presta nia deklarasaun la dun klaru.

Iha Kinta horseik, Tribunal rona tan testamunha nain 7 hodi rona sira nia deklarasaun maibe tuir observasaun nebee iha, deklarasaun balun halo Tribunal kumpriende i balun presta deklarasaun halo Tribunal tenki fera kakutak, tamba perguntas nebee hatoo husi Tribunal, Ministeriu Publiku (MP) no Defeza, testamunha la responde ka la hatene hotu.

Entretantu Testamunha Ananias da Costa nudar funionario publiku husi Ministeriu Infraestrutura nebee halo observasaun ba dezenho reabilitasaun, nein hatan perguntas husi MP, Tribunal no Defeza, maibe nia hatan buat hotu nia la hatene. Pergunta balun nia responde duni, maibe Tribunal la kumpriende.

Nune’e mos Testamunha Ponciano da Cruz Leite, nebee hola pozisaun nudar Diretor Administrasaun Finansas MJ, deklara katak, iha tinan 2009 reabilitasaun ba edefisio notariadu rejisto sivil hamutuk distrito 8, nebee tuir dokumentus pagamentu katak, kada edefisio ida montante orsamnetu dozentos dolares amerikanu.

Prosesu julgamentu ba kazu nee halao husi Juiz Koletivu nebee kompostu husi Edite Palmira (Juiz Prezidente) hamutuk ho Jose Maria de Araujo no Paulo Texeira (Juiz Internasional). Husi parte Ministeriu Publiku nian, reprezenta husi Jose Ximenes, Felismino Cardoso, no Angelina Saldanha. Defensor ba kazu nee mak Fernando Carvalho, Cancio Xavier no Sergio Hornai. Kazu nee rejistu ho numeru prosesu, 580/2012/TDD. Partisipa iha julgamentu nee, funsionario MJ, inklui familia husi arguido/a nain rua. nes/luk