DILI - Funsionario Komisaun Anti Korupsaun(KAK) hamutuk hat nulu resin rua (42) simu sertifikadu ba kursu lian Portugues ba Niveis Bazico no Niveis Intermediario, nebe realiza husi koperasaun Brazileiro ho Embaixador Brazil, hodi hasae Koinhesementu ba funsionario KAK atu servisu ho diak.
Komisario Komisaun Anti Korupsaun (KAK) Aderito de Jesus Soares informa kestaun ne’e ba Jornalista sira iha edefisio KAK Farol Dili Kinta (08/09).
Tuir nia katak, iha fulan kotuk liu ba KAK iha enkontru ho Embaixador Brazil dirize karta ba Embaixador atu fo tulun ba funsionario KAK liu husi formasaun durante fulan hat tamba tuir ita hotu nia hare dukumentus nebe iha kuaje Portugues hotu tamba ne’e hakarak ka lakoi funsionario sira tenki tuir kursu ida ne’e.
“Durante fulan hira nia laran professores sira husi Brazil mak fasilita diak tebes fo formasaun no iha formasaun ne’e, partisipantes husi Nivel Bazico sae ba Intermediario no sira nebe intermediario sae fali ba abancado tamba tuir ita nia hare Lingua ne’e, importante ba ita tamba dokumentus kuaje barak mak,hakerek ho portugues, ”dehan nia.
Total Partisipantes nebe partisipa iha Kursu ne’e, hamutuk ema nain 42 no husi numeru ne’e, Nivel Intermediario ema nain 13 no Nivel Bazico hamutuk 29, no kontinusaun ba oin laos deit kursu Portugues maibe sei iha mos kursu Inglesh.
Iha fatin hanesan,Sekretario Embaixador Brazil Francisco de Souza mos haktuir katak, dala ruma iha tempu de investigasaun ema sempre uja lian Portugues sai hanesan lian nebe importante tamba ne’e Brazil fo treino ba funsionario KAK atu halao servisu investigasaun ho diak.
Entertanto partisipantes Rozario de Araujo agresenta katak, engeralmente husi nia parte senti kontente tamba KAK fo oportunidade ba funsionario sira hodi tuir Kursu ne’e, maske ho tempu nebe oitoan maibe ita koko atu aprende tamba Lian Portuques importante ba ema hotu.
Rozario kolia liu tan katak, iha fatin hotu hotu liu liu iha instituisaun Guvernu nian lingua ofisial mak hanesan Lingua Portugues ho tetum tamba ne’e hanesan partisipantes senti haksolok ho programa nebe KAK implementa.
Tuir observasaun STL nian iha tereino nota katak, Iha seremonia entrega sertifikadu ne’e partisipante sira kontente, hodi anima konvidadus sira ho Muzika,kanta Hino Nasional, partisipa iha eventu ne’e mos Sekretario Embaixador Brazil mai timor Leste, reprezentante BPA, ho konvidadus sira seluk. lj1/lay
STL, 9.9.2011
No comments:
Post a Comment