Maibe hau la kumpriende tansa mak Katuas Alkatiri halo politik ida nakonu ho odio ho vigansa hanesan ne’e

Halo CJITL,

Los duni se bele ita bot sira mos intrevista tok Dr. Aderito Soares. Maibe hau la kumpriende tansa mak Katuas Alkatiri halo politik ida nakonu ho odio ho vigansa hanesan ne’e. Sa tan hasoru Joven ida hanesan Dr. Aderito.

Maibe tuir informasaun nebe hau hatene konaba Dr. Aderito Soares mak hanesan ne’e. Deskulpa Dr . Aderito, se informasaun ruma sala, hau husu deskulpa deit. Hau espera ita bot sei halo intrevista ruma hasoru atakes falsu sira hanesan ne'e. Deskulpa mos tan hau uza hau nia naran ‘kodigu’ deit. Hau nia preokupsaun mak tansa katuas sira halo politik odio ho vingansa hasoru joven sira hanesan Dr. Aderito ne'e. Espera informasaun tuir mai ne’e importante ba leitores CJITL sira mos.

Losduni nia mak Xefi bancada Fretilin nia durante Assembleia Konstituante (AS). Hau hanoin nia kaer papel ida mak importante tebes durante sai Xefi Bancada Fretilin iha AS. Nia mos sai Xefi ba Komisaun Harmonizasaun ba Asembleia Konstituante, nebe nia membru mak representante husi partidu hotu-hotu. Imajina deit nia xefia hotu enkontru komisaun harmonisasaun nebe nia membru inklui Marie Alkatiri, Mario Carascalao, Leandro Isaac, Clementino dos Reis, Manuel Tilman. Salut ba Adérito tan nia la hakfodak ka nervous durante diriji enkontu sira ne’e iha fulan nen laran. Imajina dala ruma katuas sira ne’e han malu to’o kleuk, maibe Dr. Adérito maneje ho didiak los enkontru sira hodi bele hetan resultadu diak.

Iha momentu neba, tuir hau hatene, Dr. Marie Alkatiri husu mos Dr. Aderito atu sai vice ministru da justicia, maibe Aderito hateten katak nia hakarak fo konsentrasaun no komitmentu bot liu ba Asembleia Konstituante hodi hakerek konsitituisaun. Entaun Dr. Aderito rasik mak propoin Dr. Domingos Sarmento nia naran ba Marie Alkatiri. Ikus mai Domingos Sarmento sai duni ministro. Hau hanoin Aderito nia komitmentu klaru liu maluk sira seluk iha Fretilin karik ? Klaru katak Doutor Aderito simu kargu ne’e atu sai membru Konstituante Asembleia, laos sai membru PN.

Enkuandu Aderito fila fali mai husi Estadus Unidus iha 2004, iha prosesu ba eleisaun Provedoria (PDHJ). Momentu neba bancada Fretilin fahe malu. Marie Alkatiri nia kandidatu mak Dra. Isabel Fereira. Kandidatu ida seluk mak Dr. Aniceto Guteres, tuir informasaun nia hetan suporta husi Presidenti Xanana. Maibe membru bancada Fretilin barak mak hakarak kandidatu Dr. Aderito soares. Iha eleisaun primeiru iha PN, resultadu hatudu Aderito primeiru lugar, Aniceto segundu lugar, no Isabel terseiru lugar. Ba fali eleisaun segundu ronde, Aderito primeiru lugar, no Aniceto lakon dala ida tan. Maibe Aderito persija tan votus rua (para sai 45 votus) hodi bele pasa.

Hare’e ba situasaun ida ne’e, bancada Fretilin halo encontru no desidi formalmente atu avansa aderito soares hanesan kandidatu ‘formal’ Fretilin nian. Sico Branco, Xefi Bancada Fretilin husu Dr. Aderito atu sai kandidatu formal Fretilin nian. Tuir Sico Branco, lideransa Fretilin nia aseita ona Aderito nia figura tan hare ba eleisaun rua iha PN, Aderito hetan suporta makas los. Oposisaun sira mos vota tomak ba Aderito.

Maibe, tan prinsipiu Aderito ‘rejeita’ oferese nebe’e mai husi Fretilin. Nia hateten ba Fretilin dehan, se nia sai PDHJ nia tenke sai PDHJ ba nasaun RDTL, laos sai fali PDHJ ba Fretilin.

Ida ne’e, halo lideransa elit Fretilin satiadu los. Maibe, membru Fretilin balu suporta los atitudi brani husi Aderito ne’e.

Antes kazu PDHJ, wainhira Aderito fila mai husi Nova Yorke, Marie Alkatiri hakarak los Dr. Aderito atu servisu iha nia gabinete, hodi promete posisaun importante ida ba Aderito. Nia husu Aderito fulan tolu laran, depois Aderito mos rejeita tan oferese bot ida ne'e, ho nia rasaun rasik. Alkatiri frustadu liu tan.

Konaba Kazu Konoco Philips, tuir informasaun nebe’e hau hatene, momentu neba, Alkatiri hakarak los Aderito atu gugat Suara Timor-Lorosae ho Dr. Fernando La Sama baseia ba defamasaun. Hakarak los kriminalisa STL ho Lasama ba defamasaun. Aderito ema ida mak kaer prinsipiu direitus umanus metin, entaun nia hare katak kazu hanesan ne’e viola prinsipiu direitus umanus nomos so para gasta tempu deit, diak liu halo servisu importante sira seluk hodi servi nasaun ne’e.

Konaba kontra lideransa Fretilin iha kongreso 2006, hau salut ba Aderito nia brani ne’e. Nia laos kontra Partidu Fretilin, maibe kontra lideransa Fretilin ida nebe mak komesa sai otoriter ne’e hodi manipula kongresista sira atu vota hodi foti liman.

Koalia konaba lideransa failhadu, nusa mak Alkatiri la resigna an husi kargo Secretario Jeral Fretilin nian tan nia la konsege hodi Fretilin ba ukun to’o mandatu hotu, maibe monu deit iha dalan klaran tanba lideransa Fretilin failha tomak?

Se ita hare didiak, oinsa mak Dr. Alkatiri hateten dehan Aderito laiha kapasidade. Iha prosesu sira ne’e hotu ita hare momos deit, katak Alkatiri la konsege ‘domina’ Aderito atu serve nia interese pesoal hanesan nia halo ba jovens sira hanesan Arsenio no Aniceto. Nia hakarak los kaer metin joven ida ho prinsipiu bot no kapasidade bot hanesan Dr. Aderito, maibe Alkatiri la konsege. Ne’e mak rasaun fundamental tansa Alkatiri hatudu nia politik vingansa ida ne’e.

Viva KAK! HAPARA POLITIK HO VINGANSA no ODIO! KATUAS SIRA TENKE HATUDU ATITUDI DIAK NO HONESTU BA JERASAUN FOUN!!!

Marcus Taibesi
marcustaibesi@yahoo.com