HAKRIBI KORUPSAUN KOLUSAUN NEPOTISMU
Hapara korupsaun!, se O lakohi naukten sira goza...
KONTRA PENSAUN VITALISIA
“Lucia Lobato Tinan 5 hela iha Becora”

Monday, January 25, 2010

Aderito de Jesus Soares: “Hau Prontu Ke’e Sai Abut KKN”

Fretilin Tenke Halo Politika Mos

DILI – Eis Xefi Bankada Fretilin-Asembleia Konstituante, Aderito de Jesus, prontu lidera Komisaun Anti Korupsaun KAK hodi kee sai abut KKN nebe kuda metin ona iha governu.

“Hau prontu simu responsabilidade husi IV Governu Konstitusional hodi lidera KAK para bele kombate (KKN) iha TL,” Aderito informa lia hirak nee ba STL via telefone, Sigunda (25/1).

Nia agradese ba IV Governu Konstitusional nebe fo fiar ba nia atu kaer KAK, embora bankada opozisaun Fretilin kontra makaas nia kandidatura ho razaun nebe la klaru.

Maske governu aprezenta Aderito nudar kandidatu forte ba komisariu KAK, maibe nia intrega membru Parlamentu Nasional atu hili tuir kompetensia nebe lei fo hodi defende intrese nasional TL nian.

“Hau agradese IV Governu Konstitusional nebe fo fiar mai hau atu sai kandidatu ba KAK, hau simu no respeita fiar nebe fo ba hau, maibe nee depende ba PN no governu, tamba durante nee hau halo hau nia peskiza rasik konaba KAK iha nasaun bar- barak, hau fiar se PN fo fiar, hau sei halo servisu ho kolaborasaun Estadu tomak hanesan Igreja, ONG no PN para bele halo buat diak ba futuru nasaun nian,” nia hatete.

Eis Adovadu Mari Alkatiri, salienta katak bazeia esperensia estudu no peskiza nebe nia halao iha nasaun barak ezistensia KAK importante tebes. Nee duni lider politika sira hotu tenke iha konsensus atu hari KAK.

“Hau hanoin ita atu kombate KKN nee iha meus oin – oin, KAK nee instrumentu ida importante atu bele kombate korupsaun. Mas atu kombate nee ita tenki halo investigasaun, maibe importante halo edukasaun para bele prevene KKN,” tenik nia.

Aderito husu ba governu atu fo apoiu makaas servisu judisial nian hodi reforsa kapasidade iha areia investigasaun, ho nunee wainhira KAK rekomenda kazu KKN ruma bele julga ho diak.

Fretilin Tenki Halo Politika Mos

Iha biban nee Aderito, husu lider Fretilin atu halo politika mos, politika hadomi no kontribuisaun para labele repete politika foer nebe akontese iha 2006. “Hau hakarak dehan, secara psikologis hau komprende Fretilin sira nia maneira kontra hau nebe hau la aparu didiak razaun saida lolos. Maibe keta iha problema 2006, Fretilin hili hau atu tur iha governasaun Fretiln hau lakohi, maibe hau husu atu Fretilin halo politika ho honestidade lolos, politika hadomi povu no nasaun ida nee no politika ho profesional maka ita bele halo buat diak ba nasaun TL,” nia komenta.

Iha parte seluk, Xefi Banda Freteilin Aniceto Guterres rejeita fo komentariu konaba kandidatu komisariu KAK nebe aprezenta husi governu. Tamba desde prinsipiu Fretilin lakohi hili Aderito de Jesus Soares ba komisariu KAK ho razaun Aderito servisu afavor ba governu AMP.

Membru Bankada CNRT-PN, Aderito Hugo da Costa apoiu kandidatu komisariu KAK nebe Governu aprezenta. Ami nia pozisaun laiha mudansa, ami fo apoiu nafatin ba Aderito atu lidera KAK.

Lei KAK tuir nia iha forsa naton atu kombate korupsaun iha rai laran, tamba nee tempu ona ba rai nain Timor oan atu hatudu sira nia kapasidade kombate korupsaun iha rai laran. “Hau pesoal kestiona se kolega nebe la gosta Aderito lidera KAK, to bainhira mak ita ita fo jerasaun foun atu kaer KAK, tamba tempu agora Timor oan iha kapasidade makas bele servi estadu,” nia hatete.

Entretantu PM Xanana oras nee dadauk prepara hela lista kandidatu foun nain tolu atu aprezenta ba PN iha tempu besik. arz/lia

Fontes: Suara Timor LoroSae (STL, 26/01/2010, pajs.1 i 15)!

No comments:

Post a Comment