CNRT Husu KAK Halo Auditoria Hatudo Grandeza Xanana Nudar Lider

Written by: Cornelio da Costa

TDF: Iha loron hirak liu ba, Presidente Partido CNRT nudar mos Primeiro Ministro Kay Rala Xanana Gusmão deklara katak KAK sei halo auditoria ba nia membro governo bainhira mandato remata. Aktu “gentlemen” ida ne hatudo katak Xanana lider ida nebe hanoin diak ba nasaun, no fo ezemplo diak ida ba rai ida ne.

Sekretariu Jeral Partidu CNRT, Dionisio Babo nebe hola parte mos iha fatin bainhira Xanana hato diskursu ida ne informa na TDF katak ida ne maka plano CNRT nian desde inisiu kedas. "Tanba ida ne mak CNRT mak iha kedas oin hodi fo inisiativa atu harii KAK no fo apoiu ba KAK nia servisu desde inisiu kedas. CNRT mos hakarak hatudo lideransa iha area ida ne, no hakarak hatudu ezemplo ba Partido hotu-hotu bainhira ukun nasaun tenki prudente no tenki tau interesse estadu nian aas liu interesse partido nian", tenik Babo.

Ida ne mos mak hatudu grandeza (supeiroritas) Xanana hodi husu KAK atu halao auditoria ba membru governu bainhira hakotu sira nia ukun iha 2012.

Ho auditoria nebee KAK halao bele hatudu maturidade politika no responsabilidade ba povu tomak kona ba kaer ukun. Tuir Virigilio Simith, Vice Presidente CNRT nian, “ida ne mos hatudo katak Xanana superior liu lider seluk”, apalagi kompara ho Mari Alkatiri ka lider seluk nebe la fo importansia ba interesse estado maibe hanoin ba deit nia aan ho nia familia.

Sekretario Geral CNRT, Dionisio Babo, iha fatin hanesan, mos hatutan katak nia kontente PM Xanana hasai buat ida ne iha tempo ikus governasaun nian. Nia la konkordaho Sekjer Fretilin Mari Alktiri nebe hatete katak, ne terlambat ona.

Tuir Dionsio Babo, Xanana nia decizaun iha tempo oportuno ne loke matan povu nian katak, Xanana iha duni intensaun diak ba povu ida ne no tanba ida ne, CNRT sei apoia tomak inisiativa Presidente Partido nebe mos kaer kargo nudar Primeiro Ministro.

“Hau hanoin CNRT apoia tomak ba lifuan PM Xanana husu atu KAK tenki halao auditoria ba ministeiru ida-idak hodi haree andamentu funsionanamentu servisu governu nee lao oinsa iha nia transparensia ho akuntabilidade duni ka lae,” hatete Babo.

Nia hatutan, CNRT mos desde inisiu husu ba governu atu halo reforma no foo edukasaun ba povu, no ba governu atu kaer ukun ho boa governasaun, kria iklima politika foun nebee diak ba nasaun nee.

Needuni, ho auditoria nebee KAK sei halao ba governu AMP nudar izemplu diak ba governu foun nebee sei ukun iha 2012, karik remata iha ukun sei hetan mos audotoria nafatin husi KAK.

“Nee izemplu diak ba membru governu, no governu foun aban bainrua mai atu kaer ukun iha nafatin responsabilidade,” nia tenik.