Presidente Republica Ramos Horta esta contente com KAK

DILI- Prezidente Republika, Jose Ramos Horta orguilu ho mudansa Komisaun Anti-Korupsaun (KAK) ne’ebe komesa ona analiza kazu Korupsaun, Koluzaun no Nepotizmu.

PR Horta liu husi inkontru ho lideransa KAK enkoraza komisaun ne’e atu bele servisu diak liu tan hodi nune’e bele hetan rezultadu pozitivu ruma. Horta kontinua hatudu ninia konfiansa ba KAK atu bele detekta koruptor sira hodi ba hatan iha tribunal.

Komisariu KAK Aderito de Jesus Soares ne’ebe akompania husi Adjuntu Komisariu nain 2, informa katak, KAK hahu analiza informasaun ba kazu korupsaun lubuk ida ne’ebe tama hafoin KAK ejisti. Nia dehan, durante ne’e ninia parte simu informasaun korupsaun barak, nune’e sira hahu dadauk kumpila informasaun hirak ne’e. “Ita hahu dadauk ona premeira faze investigasaun, premeiva faze ne’e ita bolu kompilasaun informasaun no analiza kazu ne’ebe tama durante ne’e,” deklara Aderito ba jornalista sira, Kinta, (18/11), hafoin inkontru ho PR Horta, iha Palacio Prezidensial-Dili.

Ba total kazu ne’ebe tama, Komisariu KAK ne’e lakohi temi no husu deit ba publiku atu pasensia hodi hein to’o KAK hahu bo’ok kazu sira ne’e. Aderito dehan, KAK hahu halo kumpilasaun ba kazu korupsaun ne’ebe tama husi tinan 2009 to’o agora.“Hau lakohi mensiona kazu hira, maibe atu hatete deit premeira vaze investigasaun ita hahu oras ne’e dadauk,” nia hatete.Hatan ba kazu ne’e karik involve membru governu balun, Aderito hatan deit katak ninia parte seidauk bele anunsia kazu saida no sese mak involve. Konaba inkontru ho PR Horta, Komisariu KAK ne’e dehan, atu update deit informasaun no mudansa ne’ebe KAK halao ona to’o agora. Iha fatin ketak, Deputadu husi bankada ASDT, Alberto da Silva, dehan katak, importante tebes ba KAK atu hahu ona bo’ok a’an nune’e bele hatudu ba publiku katak sira iha komitmentu duni atu kombate korupsaun.

Nia dehan, KAK tenki halo duni kumpilasaun ba informasaun no kazu korupsaun nune’e bele diversifika kazu ne’ebe prioridade no importante atu investiga lalais iha tempu badak.Alberto espera KAK sei servisu lalais liu tan hodi bele lori ona koruptor balun ba tribunal. Deputadu ne’e husu mos ba KAK atu labele hare deit kazu korupsaun ne’ebe akontese iha governasaun AMP, maibe tenki mos hare korupsaun ne’ebe akontese iha governasaun anterior. Jorgino Santos

Fonte: STL