DILI- Prezidente Republika Jose Ramos Horta fo parabens ba Premeiru Ministru Kay Rala Xanana Gusmao ne’ebe konsege lidera governu hodi hatu’un nivel korupsaun Timor Leste nian maske TL kontinua tama iha linha mean korupsaun.
Horta dehan, kompara ho relatoriu transparensia internasional tinan kotuk, nivel korupsaun TL tu’un ho pontu 9. “ Ne’e pozitivu. Hau hanoin tu’un tanba Parlamentu adopta lei Anti-Korupsaun no forma Komisaun Anti-Korupsaun,” dehan nia ba jornalista sira hafoin fila husi ninia vizita privadu ba Australia, Kuarta, (24/11), iha Aeroportu-Comoro. PR Horta dehan, relatoriu ida ne’e reforsa liu tan relatoriu EITI iha Fulan Juilu 2010 ne’ebe hatete katak TL numeru 1 iha Azia no numeru 3 iha mundu iha transparensia ba jestaun fundu petroleum.
Ida ne’e, tuir nia, hatudu katak governu AMP iha duni komitmentu maka’as ba boa-governasaun. Xefe Estadu ne’e enkoraja nafatin governu ne’ebe lidera husi PM Xanana atu kontinua esforsu a’an hodi bele hetan boa-governasaun.Deputadu husi Bankada PD, Rui Meneses, hatete, nia ladun fiar ba relatoriu Transparensia Internasional tanba la iha baze ne’ebe forti. Nia dehan, ema internasional sira gosta buka deit failansu husi nasaun ida hodi foti ida ne’e sai kestaun bo’ot. Deputadu Bankada KOTA, Manuel Tilman dehan, maske TL sei mantein iha linha mean korupsaun, maibe poin TL tu’un. Ida ne’e, tuir Tilman, tanba intermus de lei no infra-estrutura legais Timor Leste avansa maka’as duni maske iha prosesu prevensaun no investigasaun seidauk lao.
Bazeia ba Relatoriu Transparensia Internasional hatudu katak Timor Leste kontinua mantein pozisaun nudar nasaun koruptu iha mundu. Relatoriu ne’e anunsia katak TL iha kestaun korupsaun tama iha rangking 127 iha mundu no iha rangking 24 iha reziaun Azia Pasifiku ho score 2.5. Iha relatoriu ne’e nasaun ne’ebe hetan rangkin korupsaun kiik liu iha reziaun Azia Pasifiku mak Nova Zelandia no Singapura tama iha rangking premeiru ho score 9.3, Australia iha rangking 3 (8) ho score 8.7, Hongkong iha rangking 4 (iha mundu rangking 13) ho score 8.4, Japaun iha rangking 5 (17) ho score 7.8, Malayzia iha rangking 11 (56) ho score 4.4, China iha rangking 14 (78) ho score 3.5 no Indonesia iha rangking 20 (110) ho score 2.8. Rangking ikus liu iha nasaun sira hanesan Kambodia, Laos ho Papua New Guinea iha rangking 30 (154) ho score 2.1, no Afganistan ho Myanmark iha rangking 33 (176).
Nasaun ne’ebe tama iha linha verde ho 2.8% mak Denmark, New Zealand, Singapore, Finland no Sweden.
Jorgino Santos (STL: Kuarta, 24 Novembru 2010 - 16:35:27 OTL )
No comments:
Post a Comment