DILI - Prezidente Komisariu Komisaun Anti Korupsaun (KAK) Aderito de Jesus nebe foin eleitu kompromente sei lidera Instituisaun KAK ho nia matenek no profesionalimu nebe iha atu buka deteta no hamate virus KKN nebe buras makaas iha TL.
Aderito agradese ba Deputadu Parlamentu Nasional tomak nudar reprezentante povu nebe fo konfiansa ba nia liu husi votu konfiansa atu lidera KAK.
“Hau apresia ho hondra no garante katak, ho fiar boot nebe Parlamentu Nasional fo ba hau ho konfiansa atu lidera KAK halao misaun ida ho professional atu halo benefisiu diak ba nasaun ho povu Timor,” dehan Aderito ba STL liu husi via telefoni Sigunda (1/2).
Nia hatete molok hahu servisu, nia sei kria uluk estrutura KAK no programa estratejiku ba oin atu haree asuntu korupsaun nebe sei servisu hamutuk ho Governu, Igreja, ONG Nasional no Internasional inklui fo edukasaun ba komunidade no estudantes tomak liu husi kampania. “Asaun nebe hau sei halao maka rekruta funsionariu KAK no trasa programa dezenvolvementu nasional KAK husi tinan 1 ba to tinan 5 nian atu hau bele dezemvolve KAK liu husi asaun kampania nasional konaba kombate KKN servisu ho governu, Igreja, NGO atu halo ema hotu hatene konaba importansia kombate korupsaun,” dehan Aderito.
Nia hatutan katak, wainhira KAK hamarik, karik ONG ka sidadaun balun ba hato keixa korupsaun, KAK sei estuda klean kazu nee para buka hatene antes prosesu no rekomenda ba prokurador hodi estuda no hato ba tribunal hodi halao julgamentu.
Tuir planu Aderito sei fila mai TL iha semana ida nee nia laran, nia sei hamutuk ho nia familia sira atu prepara aan simu mandatu KAK.
KAK Tenki Ke’e Korupsaun AMP
Sekretariu Jeral Partidu CNRT, Doenicio Babo kongratula Komisariu eleitu KAK Aderito de Jesus atu lidera KAK ho nia matenek hodi bele kee korupsaun iha Governasaun AMP liu –liu membru governu husi CNRT sira nebe deskonfia involve iha KKN .
“Hau konkorda ema ida hanesan Aderito atu lidera KAK, tanba KAK presiza ema ida kee barani hanesan Aderito atu kaer ema se- se deit, tanba CNRT hakarak KAK nee kaer uluk ema sira iha CNRT ka AMP nebe deskunfia halo korupsaun kaer tiha sira maka foin KAK, kee fali korupsaun iha governasuan kotuk kotuk antes AMP mai, atu nee CNRT nia kampanha nebe hatete se deit maka naok osan $5cen tenki sai tiha duni,” nia hateten.
Sekjer CNRT hatutan katak, servisu nebe Aderitu tenke halo iha KAK maka halo kampania edukasaun ba prevensaun korupsaun ba eskola ho ONG no organizasaun seluk tan ho povu sira. “Hau suzere atu KAK tenke halo prevensaun ba korupsaun, se bele KAK tenki halo kurikulun hodi tau iha eskola hotu para estudante husi SD to Universidade hotu bele hatene katak, korupsaun nee ladiak, nebe presiza kombate,” nia komenta.
Parte seluk, nia propoin estrutura KAK kompostu husi ekipa servisu husi Adjuntu Komisariu KAK asuntu korupsaun, investigasuan no akuntabilidade tenke funsiona atu haree riku soin membrus governu tomak para kria ona admistrasaun estadu ho governasuan diak.
Deonicio hatete katak, maske KAK - TL ladun halao servisu makas hanesan KAK Indonezia nian. Maibe importante KAK TL sei servisu hamutuk ho polisia, prokurador ONG sira atu kombate KKN.
Sekjer CNRT garantia katak Aderito sei halao nia servisu ho professional, no sei la inklina ba partidu politika ou grupu interese se deit. Tanba konfiasa nebe nia simu husi reprezentante povu.
PM Xanana Apresia PN
Primeiru Ministru Kay Rala Xanana Gusmao, apresia tebes ho esforsu Prezidente Parlamentu Nasional Fernando Lasama de Araujo ho deputadu tomak nebe hili Aderito de Jesus nudar Komisariu Komisaun Anti Korupsaun (KAK) ho konsiensia.
“Hau apresia ba PN tanba bele aprova ona Komisariu ba komisaun Anti Korupsaun, atu nunee KAK bele funsiona no halao servisu ba interese nasional Estadu ho povu tomak,” dehan PM Xanana.
Nunee mos, Vise Primeiru Ministru Asuntu Sosial, Jose Luis Guterres kongratula Komisariu eleitu Aderito de Jesus, nebe simu ona konfiansa husi reprezentante povu hodi lidera KAK. “Governu apresia i fo parabens ba deputadus Parlamentu Nasional tomak nebe hili ona Aderito nudar komisariu KAK nebe iha profesionalismu no aten brani lidera KAK,” dehan Luis ba STL iha Palasiu Governu Sigunda (02/01).
Nia dehan, liu husi estabelementu KAK bele hahu ona nia servisu atu kombate korupsaun nebe sai nudar virus ladiak atu hamate proseisu dezemvolvimentu povu Timor. “Ita lakohi korupsaun nee atu mosu ita nia rain laran hodi hamate proseisu dezenvolvimentu, tanba nee ita hari KAK, hodi haree problema nee,” tenik Jose Luis.
Maske nunee, Jose Luis husu nafatin ba Ivo Valente no Dr. Sebastiao Diaz Ximenes nebe komkore ba KAK atu labele laran susar, maibe servisu hamutuk nafatin komisariu KAK hodi kombate KKN iha rai laran. “Hau husu ba Dr. Ivo no Dr. Sebastiao nebe oferese sira nia aan ba KAK, atu fo nafatin sira nia kontribuisaun servisu hamutuk ho Dr Aderito kombate KKN,” nia espera.
Jose Luis husu ba deputadu tomak, ONG, Igreja, konfisaun sira seluk, sosidade civil husi ki'ik to'o kawaik sira no emprezariu tomak hodi fo apoiu ba Aderito hodi haree asuntu nasional Estadu nian. qdy/arz
Aderito de Jesus Eleitu ba Komisariu KAK "KAK Sei Deteta Virus KKN"
DILI – Aderito de Jesus ofisialmente eleitu nudar Komisariu Komisaun Anti Korupsaun (KAK) hafoin manan absoluta ba kandidatu nain rua (2), Ivo Valente ho Sebastiao Diaz Ximenes, liu husi eleisaun sekretu iha Parlamentu Nasional, Segunda (1/2).
Aderito manan ho votus 40, Ivo Valente 2, Sebastiao Ximenes votu 19 no nulu (terbakar) ida. Tuir rejimentu Komisariu eleitu, iha poder hili nia adjuntu komisariu nain rua.
Komisariu eleitu oras ne’e halao hela nia estudu iha Australia. Rezultadu votasaun hamosu lamentasaun boot husi bankada opozisaun Fretilin. Tamba konsidera figura Aderito la garantia kombate korupsaun iha rai laran. Tamba figura nee desde prinsipiu arogante no buka hatun malu deit, needuni Fretilin sei la fo kontribusaun ba servisu KAK.
“Ami dezafia ba imparsialidade no kredibilidade Aderito atu diriji komisaun ne’e. Ami sei la koopera ho nia tamba ami fiar katak nia sei la kombate korupsaun, maibe sai deit liman ain ba AMP,”dehan Aniceto.
Diferente ho Xefii Bankada Fretilin nee, Prezidente AD Manuel Tilman, garante katak kapasidade figura Aderito sei halo investigasaun kriminal, atu kombate korupsaun iha Timor Leste (TL). “Nia ema matenek, no iha esperensia barak mos, tamba ne’e hau fiar katak nia bele lori komisaun ne’e ba oin,” Tilman hatete.
Prezidente Parlamentu Nasional (PN) Fernando Lasama Araujo, hateten hakarak ka lakoi Aderito manan ona iha eleisaun, needuni Fretilin tenke hakruuk ba regras nebe determina ona. “Iha nebe deit laos minoria maka obriga maioria simu sira nia hanoin. Tamba ne’e hau sente triste ba Fretilin. Ba oin diak liu ita hotu hamutuk tau konfiansa ba Aderito tamba nia merese duni,” qdy
Fontes:Suara Timor LoroSae (STl, 02/02, paj.1 i 15)!
ema hotu iha espetativa boot, ba KAK tan nee hau hein katak bele deteta duni.
ReplyDeleteapoyu sempre apoyu
hau nia hanoin katak hanesan ema Timor oan divia uluk sintemento hodi hatur an no hahalok mudansa katak, komisaun saida deit mak hari sei la muda buat ruma iha rai doben ne koando ita la koopera no lakon sintidu nasinalisme, ita hatene katak sasan hirak nebe mAk ita halakon(korup)ne povo ida terus nain nian, ita lakon sintidu humanu koando ita hare ema seluk terus no ita goja. maibe tengki iha ungsur jera iha asunto naok ne
ReplyDelete