KAK Labele Sai Inimigu ba Estadu

Radio, online – Komisariu Komisaun Anti Korupsaun (KAK) Aderito de Jesus hateten, KAK atu halao nia knar ho diak no kombate korupsaun iha nasuan ne’e KAK labele halo inimigu ho membru governu sira nia mos estadu.

Tuir Aderito agora dadaun ne’e KAK kria ona politika ida nebe diak atu oinsa hare lalaok funsionario sira iha minsteriu hothotu kona ba uza kareta estado no utilizasaun sena kombustivel. tamba ne’e KAK iha Kinta, (20 /10) lansamentu relatoriu monitorizasaun ba movimentu veikulu estado nian no utilizasaun sena kombustivel iha salaun Delta Nova Comoro.

Komisairu KAK ne’e afirma, KAK nia papel importante bo’ot rua mak prevensaun no investigasaun kriminal tamba ne’e depois lansamentu relatoriu ne’e KAK sei organiza inkontru ida ho Primeiru Ministro Kay Rala Xanana hodi koalia kona ba asuntu ne’e tamba iha regulamentu nebe ita hotu hantene kona ba lalaok oinsa ita usa kareta estado mos kombustivel iha nasaun ida ne’e .

Aderito katak KAK halo prevensaun ida ne’e atu oinsa identifkia frakesa nebe iha ita nia instituisaun nia laran tamba tuir ninia peskiza kombate korupsaun investigasaun deit labele.

Katak nia, iha tinan oin ita hotu hakarak iha instituisaun estado hot hotu ita hakarak promove saida mak ita bolu dehan planu prevensaun korupsaun iha karentidades ida ne’e ita hotu tenki dezenvolve hamutuk Ajuntu komisariu komisaun anti korupsaun (KAK ), Jose Neves hateten ba jornalista sira katak, objetivu lansamentu ne’e hanesan atu fo atensaun ba orgaun estado hot-hotu atu bele hare kona ba gestaun movimentu utilizasaun kareta estado no mos kombustivel nebe mak estado fornese ba funsionariu sira hodi uza ba servisu .

Jose Neves hateten katak,halo prevensaun ida ne’e tamba prekupasaun barak mak mai husi publiku, governu katak, funsionariu barak mak usa kupon mina estado hodi uza ba servisu privado no mos atu prevensaun prevene buat sira ne’e labele mosu tan, katak nia, sasan estado nian ba ita nia interese privado ne’e hanesan korupsaun. maibe ida ne’e sei iha dalan seluk atu hare maibe agora ita fo atensaun deit katak tenki hadia buat ruma para movimentu kareta tenki orienta barak liu ba servisu estado nian .

nia salienta liu tan katak,Monitorizasaun nebe halao durante fulan rua nia laran ba veikulu estadu hatudu 35,057 movimentus nebe klasifika ba 33% halo movimentu iha sabadu no domingo no 75% movimentu iha loron servisu. movimentu ne’e fahe ba kategoria rua, iha sidade dili laran no tama sai sidade dili laran iha sabadu no domingo total frekuensi movimentu iha dili laran hamutuk 31,954.

monitorizasaun nebe KAK hetan katak, iha dili laranmovimentu sentru negosiu total 24,766, Mercado komoro no halilaran 1,946, eskola canossa, Estrenatusaun jose no eskola primaria portuguesa balide hamutuk 4,305.

Iha lansamentu ne’e mos hetan presensa husi Ministro Agrikultura e Peskas (MAP) Mariano Asanami hahteten ba jornalista sira katak, nia rasik ,apoiu tebes ho relatoriu no monitorizasaun nebe komisaun Anti Korupsaun halo tamba ne’e bele hafanu preve ona oinsa ita hadia sisteme ne’e tamba ita iha regra nebe estabele ona maibe ita nia konsistensia ba implementasaun regra ne’e mak lao la dun diak.

Mariano Asanami hateten liu tan katak,asaun importante nebe KAK halo ne’e sistema ida nebe mak hakarak ka la koi ita tenki koko no hadia dadauk ona sistema atu nune’e halo diak liu tan iha futuru.

"Iha loron feriado ita tenki tuir regra ne'ebe iha ona instituisaun labele halo freksibilidade maibe instituisaun tenki metin ho regra," Assanami akresenta.

Iha lansamentu Relatoriu monitorizasaun ba movimentu veikulu estado nian no utilizasaun sena kombustivel ne’e hetan partisipa husi Instituisaun Ministeriu hot-hotu.

Radio Liberdade Dili OL

KAK Investiga Kazu 22, Membru Governu Balu Involve Korupsaun

DILI - Adjunto Komisariu Komisaun Anti Korupsaun (KAK), Jose Neves hatete KAK oras ne’e investiga ona kazu Korupsaun lubuk boot ida, husi kazu hirak nee kazu 8 daudauk tama ona iha Ministeriu Publik (MP) atu prosesu ba Tribunal.

“Kazu korupsaun nee deskonfia involve membru governu, hanesan ministru, sekretariu estadu, direitor no funsionariu publiku balu,” hatete Jose liu husi talk show programa Dili Democracy Forum nebe halao husi STL Media Group, STL Fatumeta, Kuarta (19/10).

Tuir Adjunto Komisario katak, KAK halao nia kna’ar tuir lei kodiko penal nia haruka atu halo investigasaun ba kazu korupsaun nebe mosu iha Timor Leste, maibe wainhira problema sei sai hanesan segredu iha justica.

Iha sorin seluk, Vise Ministro Financas, Rui Hanjam hatete, normalmete hanesan humana sempre monu ba manobra oi oin, maibe ho manobra nebe iha Governu komesa haka’as a’as atu halo prevensaun korupsaun iha rai laran.

Entretantu Eis Ministru Agrikultura Estanislao da Silva hatete, ema nunka mais monu ba manobra atu halo korupsaun, tanba ita mos iha hanoin atu a’an atu servisu ema hotu laos hariku deit ema nain ida no rua, enkuantu povu rai nee sei kontinua moris kiak no mukit.

Realidade nebe hatudu katak,ema nebe, kiak nakfilak ba riku derepenti, primeiro iha kareta ida, derepenti deit iha kareta tolu hat, no pasiar livre ida ne’e mak, ita bolu naran korupsaun, hodi habokur deit ema ida no ema seluk laiha.

Nune’e, nia apresia ba KAK nia servisu nebe,ho imparsialidade, maske KAK foin mak estabelese tinan hira nia laran deit maibe hare ba servisu lao diak, hodi indika ona membro Guvernu balu, Direktores balu ba MP, atu halo investigasaun.

Iha oportunidade ne’e, Joao Zito Viana husi ONG Luta Hamutuk haklaken katak, ita labele kolia bosok malu katak, laiha korupsaun, Korupsaun nebe buras halo projetu barak mak lao la los, no la fo benevisio ba povu.

Korupsaun halo povu barak mak infrenta problema oi oin mak hanesan uma eskola laiha, falta be’e mos, eletrisidade, Estrada, hamlaha tamba korupsaun, nune’e, nia husu ba KAK atu halo servisu ho imparsialidade hatudu servisu ho diak, salva sasan estadu nian, hodi lori koruptor ba hatan iha Tribunal. lj1 (stl)

20 Outubru 2011

Kak Seriu Investiga Kazu Korupsaun

DILI – Komisaun Anti Korupsaun (KAK), komesa hatudu ona nehan ba koruptor sira, maske seidauk bele tata, maibe ho atividade servisu KAK nian ikus-ikus nee sai ameasa ba koruptor sira iha rai laran.

Xefi Bankada PD-PN Adriano do Nascimentu hatete, KAK iha mandatu atu halo investigasaun ba kazu nebe iha indikasaun korupsaun, durante fulan hirak nee KAK komesa halao nia mandamentu komforme lei haruka.

“Ema barak kritika pratika korupsaun ho servisu KAK nian ikus-ikus nee bele fo konfiansa ba KAK katak estadu seriu haree problema korupsaun iha rai laran, ami nia partidu iha prinsipiu katak se deit inklui membru partidu Demokratiku mak tuur governu halo korupsaun tenke submete ba prosesu investigasaun,” Deputadu Adriano haklaken lia hirak nee ba STL iha edifisiu PN,Tersa (11/10).

Adriano hatutan Partidu Demokrat nunka fo orientasaun ba iha kualker membru partidu nebe tuur iha governu atu ba hariku aan ho kadeira nebe nia opkupa, tan nee bainhira iha membru governu balu tenta hariku aan hokorupsaun tenke submete ba prosesu indestigasaun hanesan personajen laos instituisaun.

Maske nunee Depudatu PD nee konsidera KAK laos tribunal nebe iha mandamentu atu halo julgamentu ba koruptor sira, maibe ho dadus nebe KAK rekoila liu husi investigasaun iha kbiit forte atu lori autor sira ba justisa. “Dadus KAK nian tendensia forte liu ba membru governu nebe mak halo praktika korupsaun, tenke lori autor sira ba tribunal,” tenik Adriano.

Nunee mos Deputadu Manuel Tilman hatete, KAK maske seidauk hatudu rejultadu servisu, maibe vizaun KAK nian hodi kombate kotupsaun bele sai hanesan aimoruk ida diak atu halo prevensaun ba korupsaun iha rai laran. “Kombate korupsaun iha dalan rua mak prevensaun no inspesaun investigasaun hodi kaer duni autor sira,” dehan Tilman.

Tilman hatutan investigasaun ba kazu korupsaun tenke klean no neneik, atu prevene korupsaun dalan ida mak hamenus odamatan sai tama osan. Pratika governu nian durante nee transfere osan ba odamatan ida, maibe husu osan mai odamatan bar-barak nebe tendensia fo oportunidade atu hamosu pratika korupsaun ou nauk. lj9/lay

STL, 12 Outubru 2011

KAK Laiha Nehan, Korupsaun Buras Iha Governu AMP

DILI — Massa grupu Consellu Popular Defeza-Republika Demokratika Timor Leste (CPD-RDTL), duvidas ba servisu Komisaun Anti Korupsaun (KAK) no Provedoria Direitus Humanus ho Justisa (PDHJ) atu lori koruptor sira ba toba iha Hotel Becora.

Ministeriu publiku prosesu ona autor balu ba tribunal, maibe too oras nee seidauk iha autor ida tama iha prizaun Becora tanba korupsaun, maske indikasaun korupsaun kuaze mosu iha ministeriu hotu nebe xefia husi membru governu nebe lidera husi Primeiru Ministru Kay Rala Xanana Gusmao.

Primeiro Ministru Xanana Gusmao liu husi dialogu abertu ho grupu CPD-RDTL rekoinese katak governu nebe nia lidera nakonu ho koruptor nebe daudauk seidauk iha prosesu justisa, maske Komisaun Anti Korupsaun (KAK) halo hela investigasaun ba iha membru governu balu ne’ebe deskonfia halo korupsaun. Hanesan kazu Vise PM, Jose Luis Guterres, ne’ebe tama ona iha tribunal, no desizaun tribunal komprova la sala.

Nunee mos agora daudauk KAK sei halo investiga hela ba membru governu balu nebe deskonfia halo korupsaun iha Ministeriu Administrasaun Ordenamentu Teritorial, Ministeriu Justisa, Ministeriu Finansa, no ministeriu sira seluk nebe iha indikasaun forte halo korupsaun.

“Ita tenki respeita instituisaun estadu nian, governu tenke hakruk mos ba tribunal, kona ba iha korupsaun kazu ne’e lao hela,” hatete Xanana hodi responde ejijensia CPD-RDTL kona ba korupsaun iha governu AMP nebe PM Xanana Xefia, Kampu Demokrasia, Sabadu (8/10).

Xanana reforsa tan katak, agora dadauk governu halo hela treinementu ba investigador balu tanba investigasaun ba kazu korupsaun laos fasil tan nee presiza iha koinesementu klean ba kestaun korupsaun.

“Ida ne’e maka Ministru balu iha ne’eba tiha ona, hau rasik mos bele ba too iha ne’eba, labele impede. Hanesan foin lalais mos mosu kazu husi Vise Primeiru Ministru, Jose Luis Guterres,” hatete Xanana.

PM Xanana apela ba timor oan tomak fo apoiu ba politik estadu nian hodi kombate korupsaun iha rai laran, tanba nudar timor oan tenki preokupa ho osan miloens hirak ne’ebe sirkula iha rai laran, bainhira latau matan osan hirak nee sei monu deit ba ema nia bolsu laos hadia povu nia moris.

Guntur nudar member CPD-RDTL iha biban nee husu ba Primeiru Ministru Xanana Gusmao atu tau matan ba problema korupsaun. Bainhira PM Xanana tenta hakiak bebeik korupsaun sei sai dezastre boot ba prosesu dezenvolvimentu rai nee nian iha futuru.

“Durante ema barak temin korupsaun bar-barak iha governu AMP, maibe to oras ne’e KAK ho PDHJ seidauk kaer koruptor sira ne’e, ne’eduni halo ita duvidas tebes,” hatete Guntur.

KAK tuir Guntur durante nee kuaze laiha nehan hodi tata koruptor, maske indikasaun korupsaun mosu iha ministeriu bar-barak, maibe seidauk iha membru governu ida responsabiliza ba aktu korupsaun nebe sira komete. Ministiu balu maske hetan ona estatutu hanesan TIR,maibe sei kontinua halao knar hanesan membru governu. “Keta halo governu harii tiha KAK ne’e atu sai fali komisaun amigu korupsaun, ida ne’e maka sai ami nia preokupasaun,” hatete Guntur. car

STL, Tersa, 11 Outubru 2011

KAK Iha Mekanismu Propriu Kombate Korupsaun

DILI – Komisaun Anti Korupsaun (KAK) iha nia mekanismu propriu atu kombate korupsaun nebe sai preokupasaun povu rai nee iha rai laran. Liu husi peskiza nebe KAK halao iha distritu 13 husu povu atu kompriende saida mak korupasaun.

Adjunto Komisariu KAK Jose Antonio das Neves hatete, prekiza nebe halao hanesan peskiza dahuluk iha Timor Leste, liu husi peskiza nee atu husu povu nia kompriensaun kona ba korupasaun.

“Peskiza ida ne’e importansia atu bele ajuda komisaun no estadu tomak bele halo planu estrateziku nasional ida no estadu atu kombate korupasaun iha aspeitu oin-oin,” dehan Jose ba Jornalista iha Farol, edifisiu KAK hafoin seremonia abetura Peskiza nasional, Sabadu (8/10).

Adjuntu KAK nee hatete dala barak ema koalia korupasaun haree liu ba leten, maibe nunka fihir pratika ruma iha sosiedade nia laran mos favorese hela korupasaun. Tan nee komunidade tenke hatene saida mak korupsaun no meius saida atu kontribui kombabete ka prevene korupasaun laos iha nivel aas deit maibe iha atividade oin-oin.

“Ita koalia korupasaun koalia hela deit mas ita seidauk iha dadus ida atu bele suporta ita nia argumentu, tan ne’e ita presiza, peskiza ida nee atu kobre teritoeiu tomak hodi husu publiku nia persepsaun kona ba korupsaun,” dehan Jose.

Iha fatin hanesan Fundador no direitor ONG insigh Keira ZBN, hatete peskiza nebe halao iha timor laran tomak sei intervista ema rihun ida deit no sei liu husi uma kain balu, atu nune bele uza no defini oinsa povu sira kompriende saida mak korupsaun. “ Ema nebe ami atu halo intervita tenki tinan sanulu resin hitu ba leten, feto ho mane naran deit ema nee’e tenki timor oan no hela iha area nebe mak ami halo estudu ba, survei nebe halo importante ba nasaun liu-liu atu dudu progresu dezenvol vimen tu iha rai laran,” dehan Keira.

Nia hatutan, Programa nebe halao sei servisu hamutuk ho lider komunitariu, tanba kuarker programa lider komunitaria sira nian mak sai hun husi buat hotu nebe halao daudauk iha kada suku.

Tuir informasaun nebe STL simu katak Peskiza nebe halao husi KAK nee’e haten apoiu tekniku no finanseiru husi ajensia internasional Cazal liu husi USAid no mos ONG nasional insigh nebe involve investigador kuaze haat nulu resin no sei fahe ba grupu tolu hodi halao survei iha timor laran tomak.

Peskiza nee’e mos parte ida husi edukasaun, nunee liu husi kampanha nebe halao ba publiku atu loke persepsaun povu nian konaba korupasaun no sa mekanismu atu kombate. lj5/lay

STL, 10/10/2011

Horon Tutuir Naokten Iha Uma Laran Governu Bispo Basilio Husu KAK Keta Tauk “Sai Asu Siak”

BAUCAU - Desde ha’ri tinan rua liuba, Komisaun Anti Korupsaun (KAK) investiga ona kazu korupsaun 17 iha uma laran governu, nebe involve membru governu balu. Ba servisu nebe KAK halao, Bispu Baucau Mgr. Basilio do Nascimento, Pr hato’o parabens ba ulun boot KAK ho ninia membru hotu.

Bispo Basilio hateten, mesmu foin ha’ri maibe KAK hatudu ona ninia responsabel nudar orgaun ida mak anti teb-tebes korupsaun iha uma laran governu nian. Pelumenus, KAK halao ona ninia knar ho diak mesmu hasoru dezafiu barak. “See sira halao ona sira nia servisu, hau fo parabens ba KAK. Maibe hau hakarak husu ba KAK, labele tauk atu sai asu siak hodi horon tutuir naokten sira iha uma laran governu nian,” hateten Mgr. Basilio do Nascimento, Pr ba jornalista iha ninia residencia Baucau, Sesta (30/9).

Tuir informasaun nebe Bispo Basilio simu katak, husi investigasaun nebe halao, KAK konsege hatene ema nebe hasai sasan husi uma laran governu, la tuir lei. KAK hetan ema lubuk ida, no iha ema sira nee nia leet, iha mos membru governu balu involve. “Kazu hirak nee persiza rezolve ho lei. I lei la ha’re ba see deit nia kondisaun. Ema boot ka ema ki’ik. La ha’re ba funsionariu ka veteranus, politiku ka agrikultor. Lei nee, lei duni. Keta halimar ho lei. Hau espera, tuir ninia funsaun no obrigasaun, KAK persiza ha’re ema sira nebe viola lei no lori sira ba lei nia okos”.

Iha fatin la hanesan, Komisario KAK Aderito de Jesus hateten, nudar organizasaun anti korupsaun, oras ne’e dadaun konsege halao servisu lubuk ida. Investiga ona kazu korupsaun 17. Maibe “Hau labele fosai instituisaun nebe-nebe deit mak involve iha krimi korupsaun. Tuir lei nebe iha, KAK tenki servisu tuir lei. Bele koalia ba ema bo’ot no ema ki’ik sobre problema korupsaun maibe labele fosai uluk instituisaun nebe involve iha korupsaun,” dehan Aderito.

Iha fulan kotuk, KAK halo ona rekrutamentu ba ema lubuk ida hodi sai investigador no oinsa bele kaer kazu. I tuir planu, investigador sei tuir lai treinamentu durante fulan ida ho balun depois mak bele ba kaer kazu. Treinamentu atu sai investigador KAK nian nee, hetan apoio husi Ministeriu Publiku.

Responde ba kestaun nee, estudante UNTL Fakuldade Fisipol, Maria da Costa agresenta katak, korupsaun nee hahalok a’at no estraga nasaun nia vida. Hahalok a’at nee persiza kombate para korupsaun labele moris buras iha pais ida nee. lay

STL, 05 Outubru 2011

KAK Hetan Ameasas Husi Ema Deskonhesidu

CJITL Flas, Komisariu Komisaun Anti Korupsaun-KAK Aderito de Jesus Hetan amiasas husi ema Deskoinesidus liu husi SMS no Telephone.

Tuir Komisariu KAK Aderito de Jesus katak hetan amiasa ne’e normal, atu nune’e KAK bele servisu makaas liu tan.

“Dala barak ema SMS no Telephone hodi amiasa, maibe ida ne’e normal, tanba KAK investiga ona kazu sanulu resin” dehan Aderitu de Jesus, tersa 27/9, iha Dili Convensaun Center-DCC.

KAK konsege Investiga ona Kazu 18, kazu ne’e mak Mal Administrasaun no Korupsaun.

http://cjitl.org